Barkatuko didazue testua barkamena eskatzen hastea eta barkamena eskatu behar dut pandemia hitza berriro ere erabiltzeagatik. Askotariko aitzaki gisa erabili izan da pandemia, baina gauza on bat ere izan duela aitortu behar diot.  Ez dakit pandemian sufritu genuenagatik edo bestela ere gainezka egiten zebilen gai bat zelako, baina osasun mentaleko gaixotasunak mahai gainera atera dira. Ez naiz atrebituko esatera normalizatzeko bidean daudenik, baina gutxienez errazago hitz egiten dugu honi buruz. Ez da urrats txikia.

Nerabeekin lan egiten dudan tokitik, esan dezaket alderdi honetan geroz eta lan gehiago daukadala. Alde batetik, pozgarria da arazoak azaleratzen direlako, baina bestetik gogorra egiten zait nerabeek dituzten motxilak bideratzea. Gai hauek kudeatzeko daukadan formazio faltak, are zailagoa egiten du gai hauek behar diren bezala kudeatzea.

Ikastetxe eta Unibertsitateak  egoera honi aurre egiteko prestatu dituzte programa edo egokitu dituzte ikasgaiak. HUHEZIn adibidez arreta psikologiko zerbitzua eskaintzen die ikasleei osasun mentaleko arazoetan laguntza emateko. Arizmendin berriz azken urteetan GPS (Garapen pertsonaleko saioak) ikasgaia sortu da eta honen helburu nagusia barne sendotasuna lantzea da. Bidea oso zaila dela jakinda hezkuntza ari da arazo honetan indarra jartzen.

Huheziko lankideak urteak daramatzate ikasleei garapen pertsonalean kontziente izateko introspekzio jarduerak lantzen. Arizmendin lan egiten dugun athlondarrei berriz, GPS saioak ematea egokitu zaigu. Bertan arnasketak, meditazioak, erlaxatzeko teknikak lantzen dira. Nerabe batzuentzako ez da ikasgai erraza asko kostatzen zaielako beraien buruarekin hitzegitea. Beste batzuentzako ordea, inglesa da zaila edo Heziketa Fisikoa (gure espezialitatea).

GPS saioez gain arnasketa, Yoga, erlajazioak  gero eta gehiago ikusten ditut ikasgeletan eta kasualitatez, edo ez Heziketa Fisikoko saioak erabiltzen dira horretarako (eztabaida hau beste baterako utziko dugu).

Ikasleei barne sendotasuna lantzeko baliabide desberdinak eskaintzea izan behar du helburu hezkuntza komunitateak, baina baliabide hauek Gorputz Hezkuntzeko orduan bakarrik izan behar dira?  

Orain arte Athlonen osasun fisikoaz arduratu gara: prebentzioan gehienbat. Prest gaude  osasun mentalera jauzi egiteko? Egin behar dugu?

____________________________________________

Kepa Isasmendi Gabilondo